Forums:
ليش عاملة بحالك هيك؟
هاي اول جملة بسمعها لما بزور اهلي. فعلا ما فيني اوصف كمية "الحب" اللي بجربوا اهلنا يغمرونا فيا لمن بعلقوا بالهطريقة على شكلنا. اللي بوجع مش بس الكلمة، اللي بوجع هو الدمعة اللي بتكون رح تفرّ من عين امك او نبرة الحزن الشديد اللي بصوت بيّك لما يطلعوا فيكي بكل اسى ويقولوا هالشي. بفكر انا شو عاملة بحالي او لهالدرجة شكلي مزري لحد ببكي وبيعمل مأساة؟ وكمان واصلين لمرحلة انو ما عم بناموا بالليل. كأني وحش بالعيلة. بس هيدا كلو نقطة ببحر لما يجي النهار الزفت واوصل على بيت اهلي ولاقي انو العيلة الاكبر هونيك. يا ربي قديش بعدّ للمليون بين انو شي 5 بدّن يلحقوني بملقط الشعر وبين هالكم شعرة اللي بشواربي اللي شاغلين بال المنطقة كلها اما هالكرش اللي قاعد على قلوبون كلن.
بس اكيد اكيد هني بدن مصلحتي وبدن ياني كون احسن وحدة. هني هيك بقولوا. وحرام كيف فيون يتحملوا انو انا اسوأ وحدة. هيدي اشيا بسمعها من انا وصغيرة لانو شكلي غير وكانت كتير تأثر فيي وتنزلني لتحت سابع ارض. هلق بتزعلني مرّات بس مرّات كتير نسويتي بتخليني اتغلب عليا مع انو بعترف انو صعب كتير لانو مش بس اهلي، انما تقريبا كل الناس وخاصة اللي بضلن يفقعوا نظريات عن الاختلاف. بس اللي بيختلف هو طريقة التعبير!
هبة عباني
