صك ملكية كوكب الارض

يا عمي! أو بالأحرى ، يا عمتي! ما عم بفهم ليش فيه رجال مفكرين كوكب الأرض ميراث شرعي حلال زلال صافي لالهم من أملاك العائلة منذ تشكل مجرة درب التبانة والمجرات المحيطة بها.

يوم بكون ماشية ع الروشة، بلاقي قرطة شباب ماشيين توبليس، يعني بالعربي حشا قيمتكن، عاريي الصدر مع عضلات مفتولة ومبرومة وخاضعة لبرونزاج مدروس جدا، والبوتوم شي انو مغطى ب”مايوه” ضييييق ملالي ومفصل ومتل قلتو. ايه، شو فيها، الكورنيش جزء من كوكب الأرض، يللي هو ملك شرعي لالهم، فينا نقول شي؟ انو فينا مثلا نلطشهن؟ أو نقلهن ليش الكن الحق تمشوا هيك، واذا شي بنت بتمشي هيك شو بيصير فيها؟

تاني يوم، بكون قاطعة من تحت جسر الكرنتينا، بلاقي رجال، عمو يعني، أو جدو، بارم وجو صوب الحيط يللي عليه غرافيتي من كل الأشكال والأنواع والألوان والأحجام، وواقف ساااااارد…أول شي بتفكري عم يتأمل هالفن الراقي، والأفكار المرصوصة جوات هالرسومات…بعدين بتكتشفي انو جدو هوي وماشي من هونيك، أو عن سابق اصرار وترصد، انحشر كتير، وقرر يفنتر ع الحيط بكل راحة ضمير…فيكي تقوليلو شي؟ تفضلي جربي تقوليلو شي…قوليلو انو يا جدو، مش مضطرة أنا شوفك عم تفنتر بنص الشارع، أو مش مضطرة تطلع ريحة المنطقة فناتير…أو الأنكى، شو رأيك اذا أنا عملت هيك تحت جسر الكولا مثلا يا جدو؟ يا عمتي، جسر الكرنتينا جزء من كوكب الأرض، وكوكب الأرض ورثة شرعية لجدو، غير انو عندو بروستات وحصر بول، ومشكلتك انتي اذا بتحبي تمرقي من تحت جسر الكرنتينا!

تالت يوم، بكون مارقة بسيارتي وسارحة والرب راعيها وما تلحقوني مش مخطوبة والخ… على طريق المطار. بلاقي ثلاث شباب ع موتوسيكل، يعني بالعربي حشا قيمة معرفتكن، الدراجة النارية، اثنين منهم توبليس (راجعي المقطع الثاني لمزيد من التفسير) وواحد البوكسر (يعني الملاكم) تبعو قاشط شي مترين لتحت…فيكي تسأليهن اذا أنا شوبت، فيني سوق موتورسيكل أنا وصاحباتي هيك؟ تفضلي، جربي اسأليهن، ورديلي خبر…انو المطار وطريق المطار، كمان جزء من كوكب الأرض، يللي هوي مسجل باسمهن منذ اكتشف قدموس الفينيقي الأحرف الأبجدية وصدفة الموريكس، وكتب ورقة عند كاتب العدل وختمها بالختم الأرجواني، وسجل فيها كوكب الأرض باسم الرجال.

رابع يوم، بكون ماشية بكل نسوية بشارع مار مخايل النهر، وبيكون في قرطة مخلوقات قاعدة ع درج مار نقولا…بتصير هالمخلوقات تصدر أصوات غريبة متل “عووووو” و”بسسسست” و”مواااههه”، فبوقف بكل حشريتي في محاولة لاستطلاع وضع هالمخلوقات، وبسألهن اذا في شي استفز فيهن هالسلوك الغريب، وللمفاجأة، طلعوا بيعرفوا يحكوا لغة الإنسان، وقال لي المتحدث باسمهن انو “شو خصك، ممنوع عبر عن رأيي؟” فقلتلو بكل ديموقراطية (قبل ما أعرف انو كوكب الأرض باسمهن): “شو الشارع ملك عام لالك تا تلطش ع الرايح والجاي؟” ، فجاوبني “ايه، بيي كتب الشارع باسمي وقلي قعود فيه”، فأنا استدركت جهلي وخطأي، وقلتلو “بعتذر منك ومن الوالد الكريم، ما كنت عارفة هالشي، تفضل مارس هوايتك، بس أمانة تسلملي ع البابا وتقلو اني بهنيه فيك، وبهنيك فيه”، ومشيت…طب انو، بورط حالي بقضية تعدي ع الملكيات الخاصة يعني؟ بفوت ع الحبس بتهمة كسر وخلع؟ الشارع باسمو، خلصنا.

خامس يوم، بكون راجعة شي الساعة ثلاثة بعد نص ليل ع بيتي، بلاقي جمعة شباب الله يخليهن لأهلهن عاملين راس أرجيلة وقاعدين بنص الزاروبة، فبزمر ت يزيحوا، بقلي واحد “وشو مرجعك هلق؟”، ففتحت الشباك وقلتلو “عفوا شو الاسم الكريم؟” قلي “خليل”، قلتلو “آه لأ، فكرت ك أمي، قلت بتأكد”. مرة الجاي بس تصير معك، جربي اسأليهن شو مقعدهن بنص ليل مسكرين الزاروبة ع ضحك وصريخ وازعاج…أو جربي تخيلي لو كانوا جمعة بنات ع بالهن بهالشوبات يقعدو هالقعدة بالليل، أو حتى يمرقو من هونيك، شو كان صار…طب بالنهاية الإنسان ما بيفرط بأملاكو، والشوارع جزء من كوكب الأرض يللي هي ملك خاص لالهن.

سادس يوم، كان عندي اجتماع كتير نسوي على بلكون كتير نسوي بحضور مجموعة كتير نسوية من النسويات، بيناتهن “نسوي” وحيد ما كان حاسس بالوحدة أبدا، لأن كان كل الوقت عم يقاطع الجميع وما يخلي حدا يحكي، ومستلم هوي النقاش وادارة النقاس والمقدمات والتفسير والتحليل والاستنتاجات وكل شي، تا اضطرينا نقلو انو المجال للكلام مش ملك خاص لالو، ولو كان مضمون حديثو نسوي يعني، يعيرنا شوية مجال نسوي ت نحكي!

سابع يوم، قررت اكتب هالمقال، لأن يبدو انو صوت النسوة هي احدى المجالات النادرة جدا يللي ما بيشعروا الرجال الذكوريين أبدا انها جزء من ملكيتهن الخاصة.

ودامت الثورة بكن/م!